🏫 பள்ளிகள்

"கல்வி அறிவால் உலகத்தில் மாற்றத்தை விதைக்க முடியும் உலகத்தை மாற்றியமைக்க முடியும் எனும் கால உண்மைக்கு சான்றானது தென்னூரில் உள்ள பள்ளிகள் தென்னூரில் மாற்றங்கள் கொண்டு வந்தது பள்ளிகளும் அதன் கல்வி போதனையும் தான் உலகின் திசையில் ஒருவர் தென்னூரை சார்ந்தவர் இருக்கிறார் என்றால் அவர் இப்பள்ளிகளில் கல்வி கற்றவராகத்தான் இருக்கமுடியும் எனும் நிலையை உண்டாக்கியது இப்பள்ளிகள், தென்னூரின் பொருளாதார மற்றும் வருமான வாழ்வாதரத்தை கட்டமைத்த பள்ளிகளை கட்டமைத்த அருள்தந்தையர்கள் ஒவ்வொருவரையும் நினைத்து நன்றி கூறவேண்டும் . நாம் தொலை தூரம் கடந்து சென்று கல்வி கற்கும் நிலையை ஒரு நூற்றாண்டிற்கு முன்பே மாற்றி அமைத்து இப்பள்ளிகள் அமைய காரணமானவர்கள் அவர்கள் ஆவர். ஆரோக்கியபுரம் பகுதியில் ஆரோக்கியநாதர் சிற்றாலயம் அமைந்த பகுதியில் மாடிக்கட்டிடத்தில் பள்ளி இயங்கியுள்ளது. இதுவே முதல் தொடக்கப்பள்ளியாக கூட இருந்திருக்கலாம். புதிய மறைமாவட்டமாக கும்பகோணம் உருவாக்கப்பட்ட பின்னர் பொத்தேரோ அடிகளார் காலத்தில் மாமரி இருபாலர் பள்ளி தொடங்கப்பட்டிருக்கலாம். 1903 முதல் 1906 ஆம் ஆண்டு வரை தென்னூர்ப்பகுதியில் பணியாற்றிய அருள்தந்தை ப்ரெத்தாய் அடிகளார் தம் பங்கில் (கிளைப்பங்குகளும் சேர்த்து) 7 பள்ளிகள் நடத்தி வந்துள்ளார். அதில் 11 ஆசிரியர்கள் பணியாற்றி உள்ளனர். அவர்கள் பங்குத் தந்தையிடம் ஊதியம் பெற்றுள்ளனர். அவருக்குப்பின் வந்த அருள்தந்தை காசுதினோ அடிகளார் ஆசிரியர்களுக்கு ஊதியம் வழங்க நெருக்கடி ஏற்பட்டதாக ஆயரிடம் உதவி கோரியுள்ளார். அதுவரை ஆயரிடம் உதவி கோராமல் அருள்தந்தையர்கள் நிருவாகம் செய்துள்ளனர் என்பது குறிப்பிடத்தக்கது.

1. தூய மாமரி ஆண்கள் துவக்கப்பள்ளி

மாமரி இருபாலர் பள்ளி அருள்தந்தை.ப்ரெத்தாய் அடிகளார் பணிக்காலத்தில் 1903 முதல் 1906 ஆம் ஆண்டுகளில் துவக்கப்பட்டது. பள்ளிகள் அருள்திரு.சோவிக்னட் காலத்தில் நல்ல முறையில் இயங்கியது. இவர் மாமரி பள்ளியில் நான்கு லோயர் கிரேடு ஆசிரியர்களைப் பணிக்கமர்த்தி கல்வி போதிக்க ஏற்பாடு செய்துள்ளார். இவர் 1914-1919 ஆம் ஆண்டு வரை பங்குத்தத்தையாக பணியாற்றிய போது கல்வியால் மட்டுமே மக்களிடம் ஆன்மிக வழியை செம்மையாக உருவாக்கவும் அமைக்கவும் இயலும் என்பதை எண்ணத்தில் கொண்டு செயல் புரிந்தார். 1927-1935 ஆம் ஆண்டுகளில் பணிபுரிந்த அருள்தந்தை மதலைநாதர் அடிகளார் காலத்தில் மாமரி பள்ளிக்கட்டிடம் கட்டப்பட்டது. இவர் ஆங்கிலக்கல்வியின் அவசியம் உணர்ந்து திருமுட்டத்திலிருந்து ஆங்கிலம் போதிக்க பிராமண வகுப்பு ஆசிரியர்களை நியமனம் செய்தார்.1958-1959 ஆம் ஆண்டுகளில் பணிபுரிந்த அருள்தந்தை.எம்.லூர்தசு அடிகளார் காலத்தில் தென்னூர் புனிதமாமரி ஆண்கள் உயர் துவக்கப்பள்ளி தொன்போசுகோ உயர்நிலைப்பள்ளி வரவால் ஆண்கள் துவக்கப்பள்ளியாக தரம் குறைக்கப்பட்டது. இத்துவக்கப்பள்ளிக்கு அருள்தந்தை. சவரிமுத்து பங்குத்தந்தையாக இருந்த காலத்தில் மாடி கட்டடிடம் கட்டப்பட்டது. தென்னூர் இருபாலர் உயர்நிலை(துவக்க)ப்பள்ளி உடையார் பாளையம் தாலுகாவில் முதல் பள்ளியாகும். 8 ஆம் வகுப்பு வரை இருந்த ESLC (Elementary School Living Certificate) அரசு தேர்வு எழுதும் முதல் பள்ளியாக இப் பள்ளி இருந்தது. தொன் போசுகோ பள்ளி ஆரம்பிக்க முதன் முதல் உதவியாக இருந்ததும் நமது ஆண்கள் பெண்கள் நடுநிலைப்பள்ளியாகும். இங்கிருந்த தடவாளப்பொருள்கள் வழங்கப்பட்டது குறிப்பிடத்தக்கது.

2. தூய சூசையப்பர் பெண்கள் தூவக்கப்பள்ளி

அருள்திரு. அ.எஸ்.லூர்தசு அடிகளார் காலத்தில் 1925 மாணவியர் பள்ளி தோற்றுவிக்கப்பட்டுள்ளது. அதுவே புனித வளனார் துவக்கப்பள்ளியாகும். அப்பள்ளி அருள்தந்தை எம்.லூர்தசு அடிகளார் 1958-69 ஆம் ஆண்டுகளில் பணியாற்றிய போது நடுநிலைப்பள்ளியாக தரம் உயர்த்தப்ட்டது. 1977 ஆம் ஆண்டு சூலை 13 ஆம் நாள் வளனார் நடுநிலைப்பள்ளியிலிருந்து 6,7,8 வகுப்புகளை தனியாக கொண்டு ஆலய வளாகத்தில் அருள்தந்தை செல்வராசு அடிகளாரால் மக்கள் உதவியோடு கட்டப்பட்ட அன்னை லூரது கலையரங்ககட்டிடத்தில் அவரின் சீரிய முயற்சியால் உயர்நிலைப்பள்ளியாக செயல்பட்டது. 1977 முதல் 1986 ஆம் ஆண்டு வரை கலையரங்க கட்டடிடத்திலேயே உயர்நிலைப்பள்ளி செயல்பட்டது. நடுநிலைப்பள்ளி துவக்கப்பள்ளியாக தரம் குறைவாக்கப்பட்டது. இப்பள்ளிக்கு அருள்தந்தை.வி.ஐ.பீட்டர் காலத்தில் புதிய மாடிக்கட்டிடம் கட்டப்பட்டது. பெண்களின் கல்விக்காக வளனார் துவக்கப்பள்ளி ல் 1925 ஆரம்பிக்கப்பட்டது. 1958ல் நடுநிலைப்பள்ளியானது, 1977 உயர்நிலைப்பள்ளியாக உயர்த்தப்பட்டது. அது பின்னர் லூர்து அன்னை பெண்கள் உயர்நிலைப்பள்ளி என பெயர் மாற்றமானதால் மீண்டும் வளனார் துவக்கப்பள்ளியானது.

3. அன்னை லூர்து பெண்கள் மேல்நிலைப் பள்ளி

கல்வியால் மகளிரிடம் மாற்றம் ஏற்படுத்த கல்வி கலப்பையை கையில் ஏந்தியது திருஅவை. தென்னூரில் வளனாரின் துணையோடு துவக்கப்பள்ளியாய், நடுநிலைப்பள்ளியாய்,உள்ளங்களின் உறுதுணையோடும் உயர்நிலைப்பள்ளியாய் எண்ணற்ற நல்ல அருள்தந்தையர்களின் களப்பணியோடும் பணியேற்ற கன்னியர்கள் ஆசிரிய ஆசிரியைகளின் இடைவிடா முயற்சி மற்றும் மக்களின் ஒத்துழைப்பு என திரண்டு நீண்ட பந்தயத்தின் வெற்றிப்பரிசை வென்று களித்தது தென்னூர் லூர்து அன்னை மேல்நிலைப்பள்ளியாகும்.

காலம் விரைவாக பயணிக்க கல்விப்பணியில் உயர்நிலைப்பள்ளியெனும் பூரிப்பில் 9 ஆண்டுகள் களிப்பில் கடந்தது. காலத்தின் முதிர்வில் 1984 ஆம் ஆண்டு அருள்தந்தை.வின்சென்ட் பெரர் அடிகளார் பள்ளி தாளாளராக பொறுப்பேற்ற பின் அவரின் ஈடுபாடான பணிக்காலத்தில் கும்பகோணம் ஆயராக இருந்த மேதகு ஆயரோ டி.பவுல் அருள் சாமி ஆண்டகை ஒப்புதல் மற்றும் ஆசிர்வாதத்தோடு, ஆசிரியர்கள்,மாணவர்கள் உறுதுணையோடும் மற்றும் மக்களின் ஆதரவோடும் 1986 ஆம் ஆண்டு செப்டம்பர் 18 ஆம் நாள் மேல்நிலைப்பள்ளியாக தரம் உயர்வுப்பெற்றது. ஆலய வளாகத்தில் கலையரங்க கட்டிடத்தில் உயர்நிலைப்பள்ளியாய் வகுப்புகள் நடைபெற்று வந்த உயர்நிலைப்பள்ளி மேல்நிலைப்பள்ளியாய் புதுத்தெருவில் அமையப்பெற்றது. தன் இலக்கில் சுற்று வட்டார மாணவிகளின் கல்வி வளர்ச்சியில் தனி இடம் பிடித்து தனக்கென புதுப்பாதையில் மாணவிகளை மாற்றத்தின் தளவாடங்களாக தயாரிக்கிறது என்பதில் பொய்யொன்றுமில்லை. இப்பள்ளி அரசு தேர்வுகளை எழுவதில் மாணவிகள் சிரமப்படுவதை கருத்தில் கொண்டு அருள்தந்தை.சவரிமுத்து அடிகளார் காலத்தில் 10 மற்றும் 12 ஆம் வகுப்பு மாணவிகள் அரசுப்பொதுத்தேர்வு எழுத தனி தேர்வு மையம் பெற அரசிடம் அனுமதி கோரி அரசின் அனுமதியோடு பள்ளியிலே தேர்வு மையம் பெற்றது மாணவிகளின் சிரமத்தை தவிர்த்தது என்பது சிறப்பாகும். மாணவிகள் சிரமமின்றி வந்து போக ஏதுவாக போக்குவரத்து பயணத்திற்கு ஏற்ற இடத்தில் அமையப்பெற்று அனுதினமும் சுற்றுவட்டார மாணவிகள் பேருந்துகளில் வந்து கல்விப்பயில்கின்றனர். மாணவிகளுக்கு தனி விடுதிகள் மாணவிகளின் பொருளாதார வசதிகளுக்கு உகந்த வகையில் வசதிகளோடு அமையப்பெற்றுள்ளன. விளையாட்டு மைதானம் காற்றோட்டமான இடப்பரப்பை கொண்ட வகுப்பறைகள், கல்வி நுட்பம் தெரிந்த ஆசிரிய, ஆசிரியைகள் பல் திறன் வளர்க்கும் குழுக்கள் என பள்ளி அடுத்த தலைமுறையின் புதிய வழி முறையை சொல்லிக்கொடுக்கிறது. தூய இருதய குருமட கன்னியர்களால் பள்ளி நிருவாகம் செய்யப்படுகிறது. பள்ளியின் தாளாளராக பங்கின் தந்தையாக பணியேற்கும் அருள்தந்தையர்கள் செயல்படுகிறார்கள்.